IFUSCO XXIV

Азкс
Марина Агеева

Катя вармакс лийсь паксява. Сон ласьксь мала вирнять шири.
— Да коста, шта, тяса, нинге идькс пингста содаф васттнень эса, эвондасть ня ластя ломаттне, да нинге кунардонь пингонь щамсот? И мес тяни синь вяшкозь ардыхть мельган? Пади, ширесонк кодамовок кино тиихть, и мои эводень ёфси стак?
Но кода корхнихть, Шкайть лангс надияк, а пряце прясот улеза. Сяс Катя кочказень мельдень виензон и ласьксь тяни ни фталу апак варжакснек. Вага вирняське, колма сядошка метра лядсь. Но дяряй ворьгодеват ластятнень эзда? А тяса нинге вирьстовок каршезонза лиссь кати-кодама ломань. Катя шуфтомсь вастозонза. Ласькомс сяда тов ашель месть. Да и виецка ашель: ваймоц пись. Сяконьбес ласькомста фкя пильгоц лкштадсь стане маряйста — нльне сельминголенза шоподсь.
– Мезе ули, ся ули, — стирсь лоткась и кармась таяскотфста
ванома ластятнень лангс. Ёткстост фкясь, сяда ингольдесь, апак
учсек яфодезень кядензон, аф лама пинге нюрьгсь алашанц лангса,
а сяльде реськафтсь кунф мастору. Мяштезонза пезфоль нал.
– Конешна, тя кино, — арьсесь стирсь. — Кода мле лиякс?
Дяряй эряфса тяфта уленди? Аф! А кодама, шта, кино снимандайхть?
Катя тяни ни кепотьф мяльса кармась ванондома, мезе ули сяда тов. Вага вдь, аф телевизорса, а видеста вакссот моли фильмась.
Вирть ширде коль лийсть и лийсть налхт. И вов ни тага кафта ластятне усковихть алашаснон мельге.
– Ва тя кино! Историческяй боевик, улема. А кит, шта,
актёрхне? Молякан маланяти, пади, киньге содан ёткстост?
Автографкя анан.
Молембачк стирть лядьсь мялезонза: мархтонза аш кагод пакшкацка. Пара, кда синцень ули. А кода анама? Совестцевок аф саты. Катя варжакстсь велеть шири. Пади, кенерель тов и меки блокнотонкса?.. Варжакстсь велеть шири... А тоса... тоса... кафта панда ётконяса... ашезь няев фкявок куд!..
– Ватта, ватта!.. — изь лотксе дивандакшнемда стирсь. — Синь
аф аньцек марнек съёмочнай бригадаснон кяшезь, велетьке урядазь
сельмингольде. Улема, кодама-бди качам нолдасть...
Ластятне тя пингть шарфтозь алашаснон и ворьгодсть. Катя пельсь шорсемда кинонь тиихненди. Лоткась фкя вастс и учсь, мзярда мегафонцта пилень панды вайгяльсь азсы: «Стоп! Снято!» Ётась ветешка минута, а кивок изь кашторда. Перьфпяльсь стама жа сетьмоль, аньцек нармоттне циннясть. Катя сонцьке аф содасы, мес куфкстсь. Аф пелезь маладсь праф алять ваксе:
— Вай, кода реськафтоть! Бта афкукс. Мои мянь эводень. А
кодама фильма снимандатада? Массовканди ломатть аф эрявихть?
Но ся кода лапотьфоль кунф, станяк и ащесь.
– Вай! Да тя, улема, няка, — шарьхкодсь стирсь. — Эхярь вдь ломань.
Сон валом нажядсь видеста ваксозонза и токазе прафть пильгосурса. Алять пряц — лык! — велясь Катянь шири, и стирть лангс варжакстсть ловажань кельмоси сельмот...
Катя цють изь опама:
—Вай, да сон кула!..
Стирсь ушедсь потама фталу. Сельмонза кодавок ашесть явфтов прафть лофтана шаманц эзда. Седиец, мярьгат, эрьгодсь мяште потмозонза, мярьгат, ёрась лисемс тоста. Пильгонза тапарясть тишеть ёткс, сон пупордась и эсь сересонза реськафтсь копоренц лангс. Сельмонза кати эводемати, кати сярятьфти пяшкодсть сельмоведьта.
Стямшкац ашель. Конезень сельмонзон. Арьсесь: вов панчсыне – и меки сембось ули сякокс. Ашельхть кодамовок кинонь тиихть, ластят, шавф ломатть. Аньцек мзярда панжезень, ёфси абондсь. Вельхкссонза ащесь цёра и ванць видеста лангозонза. Щаф-каряф киноста да музейста няентьф сире пингонь щамса. Кядьсонза тогомоль. И Катянь седиец озась: тя кино. А кулось ёфси аф кула, а пяк цебярь артист.
Ожука, тя вдь вирьста ляцендись, тя сон бта шавозе ся алять. А мес тнярс аф стяй кулыкс прянь няфтись? Ся сонне тевсь, а вирьста лисись сейчас чипордасы Катянди сельмонц, мярьги: «А-а, эводеть? Ватт, кодама виец искусствать!»
Но вирьста сафсь сонць ащесь абонтфста. Тетькозень Катянь лангс сельмонзон и ваны апак чипоряк.
Стирть седиец пянкштадсь: аф, тя, улема, аф кино... А мезе ина, кда аф кино? Кода стясь пильгонзон лангс, аф мяляфтсы, хоть пяле минутада инголе арьсесь: стямшкацка аф ули. Ёрась тумс ласькозь. Тумс?.. А кда тя всётьки кино? А нят — актёрхт? Рахсемада сонь, Катянь, лангсонза ули пефтома. Сяс стирсь видемсь, петезе рямшаф кофтанянц, варжакстсь видеста цёрать сельмос и пшкядсь:
– Шумбрат. Тинь тяса кино тихтяда, да? Кда шорянь мезьсовок, простямасть. Мон вдь аф нарошна... Мон тяса, аф ичкозе, нормальхть кочксень... — Катя ёрась азомс нинге тага мезе-бди, но корхтамать поладозе цёрась:
– Тонь валхне бта мокшеннет, а щапне... Тяфтапт мон афи няендень. Ширесонк аватне наряжакшнихть лиякс. Кият тон?
– Тон рольцень тяфта тонафнят или лангсон рахсят? Тон вдь
актёрат? Стане?
– Мон мокшан. Эрян мала веленяса. — Цёрась арьсезевсь. – Ногайхнень содасайне, руснень, татархнень содасайне. А кит стапне актёрхне, ашине куленде. Нят ломатть или жуватат?..
Катявок арьсезевсь. Мялец эрь валда меле коль сядонга колсевсь и колсевсь. Мезе тя тяфтамсь? Кода шарьхкодемс?
– Тя тон афкукс шавить ня ломаттнень? И кодамовок тя аф
кино?!
— Шавине. Кальдяв, мес кржа лябань эздост. А мезе стамсь кинось?
Стирсь мезевок изь аза. Сон ландязь ландясь, озась нарнять лангс.
— Мезевок аф шарьхкодян.
— А тон мезе ёрат шарьхкодемс?
– Коза мон тяфта повонь? — тошказевсь, варжакстомок перьфпяльге, Катя. Меле комафтозе прянц и кармась лятфнема семботь, мезе мархтонза лиссь. А цёрась тусь кулоть шири. Аф ламос ащезь мрдась:
—Стяк ни, аде. Ату ногайхне курок меки мрдайхть.
– Кит мрдайхть?! Коза аде?! — таянаста кизефтезе стирсь.
— Кати пряширде токафкат, кати видекс аф тя аймаконь
эряйсят? Эста кият?
– А тон тонць кият?
Цёрась прянь шнафтозь токафтозе пяльхканц мяштезонза:
– Видекс ширденнят. Кда тястонь улелеть, содалемайть. Лемозе Кедяр, эрян Кальгужеса.
– Ащек, ащек. Кода Кальгужеса? Вдь монга тостоннян...
Катянь ашель мялец токамс вастонц, но тяса марявсь алашань цяфама. Кедяр фатязе стирть кядьта и — вири!
– Тя, улема, инксот мрдасть. Маряк, мялезост туть. Лемце кода?
– Катя... А мезенди теест эряван?..
— Мезенди? Да тонь инксот урень базарса, содасак, кодама питне максыхть! Шамас мазыят, ронгс-пондс удалафат. Цютькада шуванят. Арьсень: лафченят, а тон, ванан, ласькондят аф кальдявста. Тазат, улема.
—Лиясь монь вастсон ласьколь нинге сяда вишкста. А мон кургозень
келепнине, ванондонь лангозонт. Арьсень, ширесонк кино тиихть.
— Да мезе ся стамсь кинось?
– Ламос азондомс. Оду кода-кода. Аде тяста, ату видекс
рабынякс аран.
— А рабынясь тя мезяма?
– Мезяма, мезяма... Уре ава.
Шуфттнень ёткова ласькомс стакаль, но Кедяронди, улема, сашендовсь тиендемс тянь сидеста. Сон нумолда эрекста ётнесь тараттнень эшкска. А Катя кода изь тяряфне улемс лацонза, сякокс сидеста тапарякшнесь...
Фталдост вайгяльхне кунара ни исть кулев, но Кедяронь ашель мялец лотксемс.
—Ащек, вайматама. Ваймозе потмозон аф тяльгонди, — эняльгодсь стирсь.
—Минь ни пцтай пачкодеме, вайгяльбешка лядсь. Кда сизеть, лоткатама.
— Вайгяльбесь ни кода-кода сяськови.
— Эста аре сяда тов.
Молембачк Катя ванондсь перьфпяльге. Вирсь вага, стамка, кодама ульсь. Но — ластятне... И Кедяр... И мес ашезь няев велесь?.. Мезе тя?.. Афкукс или он?.. Коза, шта, мон повонь тяфта?..
Арьсеманзон лоткафтозень цяторф, кона малаткшнесь ширезост ситерьксть ширде. Варжакстсь Катя ся пяли и цють изь пра. Видеста лангозост кяльсь...
— Офта?! — Катянди-арам, сон тянь ювадезе, но лиссь
тошказня...
— Офта, — кашкомф вайгяльса поладозе цёрась и валхтозе
лафтустонза ляцеманц. — Эх, налда лядсь аньцек колма! Мархтост
вирень азорсь афи веляфтови. Архт ворьть тяста ласькозне, а мон...
— Мезе — тон?
– Архт тяста, мярьгонь, тят шорсе!
Катя пильгосур лангса ласьксь конашка-бди васта и лоткась эчке тумоть эшксс. Аф эстокиге варжакстсь тов, коза лядсь Кедяр. Пельсь варжакстоманц. Но... варжакстсь. Кафта налхт ни офтть мяштьсотольхть, а сон стаки мольсь Кедяронь лангс. И стане рангсь — прякедце стяй. Вов сатозе цёрать и амборондазе. Катя шуфтомсь вастозонза. Шарксталь сонь ширезонза офтсь — сякокс афоль тув ласькозь. Аньцек салава тошкась: «Шкабаваз, ванфтк Кедяронь... Шкабаваз, ванфтк Кедяронь»...Тя пингть пилензон пандозе офтть рангстамац. И — сетьме... Варжакстсь тага. Кужеть кучкаса лапотьфоль вирень азорсь. Налда башка, бокозонза пезфтафоль пеель. Сон нинге ляксь, но шарьхкодевсь – лякомс лядсь аф ламос. Пцтай вакссонза прафоль ломанцьке. И сонга ляксь.
- Кедяр, шисат?
- Улема.
Цёрась тяряфтсь озамс, но озамшкац ашель. Кяденза сусконтфтольхть. Шамацка верботмосоль. Куфцезь лаподсь меки и тошказевсь:
— Архт видеста шинь стяма шири. Ётат вайгяльбешка, каршезт пови оцю, рашку тума. Варжакстт прязонза. Алудонь тарадозонза повфтаф букань сюра. Уфак эзонза колмоксть. Эста сайхть лездома Вирьгужень ваныхне...
— А кда кивок аф сай?
— Сайхть... Аньцек турак...
– Ськамон аф молян. Тейне тумоське аф муви.
Катя лездсь стямс Кедяронди, и синь тусть. Цёрась мольсь стакаста, савор. Стирсь кяляцязне корхнесь:
—А тон отькорят! Пеельса офтть каршес! Тяфтама киноста
няят — иднота седице кочкярязт туй. А тяса...
Но Кедяр мезевок изь аза. Сон вихца ускозень пильгонзон. Катявок лоткась корхтамда. Сяда тов синь шаштсть ни апак каштортт.
Лядыкс вайгяльбесь марявсь пефтомокс. Стирсь кельгондезе вирьге якаманц. Но синь вирьсост нумолга аф фалу няят. А тяса, архтака — офта! Сяс эрь лопань кашторфста теенза кулевсть вирень азорть аськолксонза. Аф лама пингта меле Катя проке пульзясь. А ваймамс ашель кода.
—Да коса ина ся оцю тумось?! Шять, минь аф ся шири
мольхтяма? Катя варжакстсь цёрать сельмос, но синь коньфтольхть.
Кедяр люмбась и прась ёжефтома.
— Пара!.. Сембось пяк пара!.. Аньцек ашезь сатне, штоба тон кулолеть!.. Да коса ся афпаркс тумось?! — Стирсь варжакстсь перьфканза. Кержи ширеса шуфттнень ёткова цифтордсь валдоня. Катя тяряфтсь кеподемс цёрать, но виец ашезь сата. Савсь фатямс кавлалда и валомне, мекпотазь ускозь ускомс модать ланга.
– Ну ... тон и... стакат... кафксо... гемоньшка кила ... улема... а пади... и нинге... сяда лама...
Катя стакаста тарксезе ваймонц, но вирь трвати ляткшнесь ни проке кржа, сяс сон изь лотксе, а стаки ускозе эсь мельганза ёжефтома цёрать.
Вов и вирь трвась.
– А, вага тон косат! — стирсь няезе рашку тумоть. Кадозе Кедяронь вирьбулоняв, ласьксь ёндолса явоштф шуфтть алу. Ванозень тараттнень. Букань сюрось нюрьгсь эхярь алоня и пиндолдсь. Сявозе, путозе кургозонза и мезе ули виец уфазевсь. Учсь кайги торама, а кульсь кодама-бди вжнама.
—Да тяфта монь аф аньцек ваныхне — шалхка прястон
каруське аф марясамань!
Катя кяжиясь эсь лангозонза и нинге весть уфазевсь сюроти... Ламоксть савсь варжамс. Мекпяли удалась: сюрось нолдась кайги вайгяль. Колмоксть турафтомдонза меле стирсь повфтазе сюроть меки и маладсь Кедяронди. Ся станяк ёжефтомоль, вихца тарксезе ваймонц.
Катя кармась ускомонза тумоть шири. Мзярда ни пцтай пачфтезе, вирьбулоняса марясь кашторф. Коста и кона пингть Катянь ваксс нажядсть кафта сакалу алят, сон изь шарьхкоде. Кядьсост тогопт. Няезь праф цёрать — кеподезь ляцемаснон стирть лангс.
—Кедяр, мезе мархтот? — сетьмоняста пшкядсь фкясь. А
омбоцесь стаки кирдезе тогомонц стирть лангс водендафста.
Катянь изь ляда виец валнявок азомс каршезост. Сон савор озась цёрать ваксе и мторгодсь шалхкалонза:
– Лезтт ва тяфтапненди. А синь тогом каршезт кеподихть.
Алятне тя пингть шаштсть проке малати. Фкясь комась Кедяронь вельхксс, а омбоцесь кяжиста пшкядсь стирти:
— Кият тон тяфтамсь? Мезе тиеть ялганьконь мархта? И... мес тяфтамат?
– Кодаман мон, тя аф тонь тевсь. Пильгтон, кода и тинь,
кафта, кядьтонга, сельмодонга, пиледонга. А теенть-арам, мон
кодамовок чуда-юдан, што ли?
– Мезе стамсь чуда-юдась, аф содасаськ, но тяфтама щапт-
каряпт минь ашеме няенде. А стак, стирь, бта ломанькс няеват.
– Пасиба Шкайти, хуш тянь няесть. А ялгантень сивомс
ёрайне. Али аф няйсасть пей вастонень?
— Тят васькафне. Мон ламоксть няендень тяфтама ангоркст.
И кадондсазь синь аньцек офтонь пейхне да кенчне!
— Эрь, кда ни тон семботь содасак, эста месть машнефтят эсон? Кати-месть кизефнят. Тят лаборда, лучи лезтт Кедяронди, — няфтсь стирсь кядьса цёрать шири. Сакалусь тага абондсь:
– Ваттака, лемонцка содасы, — кати эстеенза, кати мархтонза
сайти пшкядсь. Омбоце аляське шоворсь ёткозост:
—Лездомс видекс эряви. Сяда меле лацкас кизефнесаськ, кие
сон тяфтамсь, коста угадясь и мезе тяса лиссь.
Ня валда меле алятне ажалаконя кеподезь Кедяронь и савор тусть меки вири. Катянди кивок валга изь аза, но сонь ашель мялец лядондомс сяда тов ськамонза, да нинге тяфтама вири. Сяс кенордась мельгаст. Пяле вайгяльбеда меле лиссть вирень кити и тяса тусть сяда эрязста. Катя сизесь, вихца ускозень пильгонзон. Но ризнась аф эсь инксонза, сембе арьсеманза Кедяронь колгальхть: «Шкабаваз, ванфтк эряфонц». Кулондяряй цёрась, Катянди мзярдовок ни аф содави, мезе тя тяфтамсь лиссь вирь кужеса. Тяфта арьсезь молембачк афи приметазе, кода лиссь вирьста, кода нежедсь эчке шочконь перяфксти и нльне эводсь, мзярда читордозь панжевсть ортатне. Кедяронь сувафтозь, а Катянь колга бта юкстасть. Стирсь сонць ётась ортать омбокс, озась пизелкскять алу ладяф скомнянять лангс, варжакстсь сей-тов.
Тяса колма аф оцю куднятольхть, перьфкаст якафтсть ломатть, пцтай най алят. Авада проке кржаль.
«Афоли свадьбас ковга срхкасть, — арьси Катя. — Мокшень щапт-каряпт лангсост».
Но кати-мезсь бта аф станяль... Аф, аф свадьбас срхкафкс ащихть. Щамсна аф праздниконнет-иланнет — петьксфтомот и цютькя бта рдазунят...
Аватне синць пуромсть марняс, варжакснихть стирть лангс и сетьмоняста корхнихть эсь ётковаст.
Фкясь эздост маладсь ваксозонза и апак каштортт лоткась. Стирсь аф мяльвельде стясь шулкфты пильгонзон лангс и шумбракстсь.
– Тонцьке фалу ульхть тазаня, стирняй. Васенда афи шарьхкодеме: стирят али цёрат. А тяни няйса — стирят. Да никак ёфси мокшават.
— Мокшаван.
— Монь лемозе Мазава, а тонь?..
— Катя.
– Лемце аф мокшенне. Коста угадять тяза?
– Коста?.. О-о, тя азкссь пяк кувака. Афолемайть каваня инголи? Пекозе пяк вачсь.
– Вай, да виде! Кода тя мон тяфта... Аде мельган, тят визде.
Авась сувафтозе Катянь кудняти и озафтозе шра ваксе.
Кудботмоса шобдаль. Стена шочкне, поталаксь содботмосольхть. Шрась, эзепне аруфт, улема, пеельса крксезь штафт. Аф оцю вальмянява валда пцтай ашезь пачкотькшне кудботму. «Пянакудсна, што ли, тяшкава качады? — арьсесь стирсь. Варжакстсь.—А пянакудть, афоли, турбацка аш?..
- Эрь, тяни мезе ина, коршак ва пси лямняда. Пиф якстеряпскада суск, вов и вийхневок мрдайхть, — кяляцяень вайгяльса корхтась авась.
Катя изь учсе омбоцеда кошардома. Сявозе шуфтонь оцю куцють и кармась лямда коршама.
-Эхи танцти! Мзярдонга тяфтамда ашень ярхцсе. Спасиба, Мазава.
Азоравать мялезонза пароль, мес шназь пидефонц-паньфонц. А мезе стамсь «спасибась», ашезе шарьхкоде. Ёрась кизефтемс, но лоткась. Кизефтсь проке лия:
-Коста ина сей угадять? Кода васьфтеть Кедяронь мархта?
- Кода? Тячи шобдава срхкань нормаленкса. Ётань карафть кувалмова, валгонь лашмоти. А тоста лисень, ванан — видеста лангозон ардыхть ластя ломатть...
Стирсь азондсь. Мазавась абондозь ащесь. Кой-коста вайкснесь. Сонга Кедяронь лаца коль кизефнесь, мезе тя, мезе тона. Мекпяли лоткась кизефнемда.
— Мон, стирняй, аф шарьхкодян, мезе тон азондат. Пади, сон шарьхкоттянза?
— Кие?
- Аф ичкозе вирьса эряй атя. Сяшкава сире, лемонцка сембе кунара юкстазь. Тяни лемнесазь Вирятякс. Корхнихть, кле ваймонц идемевозти нинге одкс пингстонза мизе. — Мекольдень валонзон авась азозень тошказь. И пелезь варжакснесь перьфканза: а кда атясь тяса?
- Афолемайть вяте ширезонза?
- Вятемс вятте, — аф пяк мяльвельде азозе Мазавась. —Аньцек инголи казнят анокламат. Лофцоня, вайвелескя, алнят.
Мзярс авась срхксесь, Катя лиссь ульцяв и озась сяка пизелксть алу. Аф ламос ванондсь-тись, стясь и тукшнесь ни ся куднять шири, коза сувафтозь Кедяронь. Но тя пингть фталдонза марявсь Мазавать вайгялец:
-Тят яка. Тоза ашесть мярьге сувсемда. И лоткак пичедемда. Пчкяй. Аде, коза срхксеть эзьке.
Стирсь комафтозе прянц и тусь авать мельге ортатнень шири. Синь эрязста ётазь перяфксть и сувасть шуфттнень ёткс. Мзярошкас мольсть вирень такор киге, а меле шаркстасть и тусть цють няеви яннява.
Катя аньцек тяни марязе, конашкава лажадсь куду, тядянцты, ялганзонды. Но и пяк таколдсь: кодама стама идемевозь сави няемс, пади, ёфси корхтамс мархтонза... Мазавась аськолясь эрязста, фталу афи шарфнесь.
Молемс савсь ламос...
Авась апак учсек лоткась, шарфтсь Катянди, сурса-кядьса няфтезь азсь латта: няк, пачкодеме. Нльне тошказьге пельсь пшкядемать. Стирсь шарьхкодсь: Мазавась пели. И соньге сявозе пелема... Шобда вирь кучкаса исть маряв нармонень вайгяльхть, тишеське тяса кодама-бди лияль. Афи азови, мезень коряс, но лияль! Катянь копорьге тусть панжапт.
Авась маладсь кудняти, чакась сёлкф кенкшти и сятявняста пшкядсь:
—Ульхть шумбра, Вирятя.
-Эстеентьке шкайхне максост эрьгя сяда кизос, — марявсь
кенкшть фталда.
И тя пингть кенкшсь читордозь ушедсь панжевома. Катя нльне ваймонц тарксемда лоткась. Сон арьсесь няемс мезень-мезень ёфксонь Черномор; кабаконашка сакал мархта. А каршезост лиссь тяфтамка атя — аф оцю, аф ёмла, аф эчке, аф шуваня... Стирсь тянь изь учсе и нльне юкстась шумбракстомс. А вирятясь няфтсь кудть инголе скомнять лангс и тердезень инжиензон озама.
- Сюкпря танцтинянкса, — пшкядсь сон звать кядьста кзнкскять сявомстз. — А тяни архт, Мазаваня, эсь кигат.
Авась панжезе ни кургонц, ёрась пшкядемс. Атясь венептезе каршезонза кядьлапшенц, бта ёразе пандомс сянь кургонц:
-Тят ризна. Архт.
Мазавась сюконясь атяти и тусь.
Катя тячи сняра няйсь, сняра кульсь — тяни ашезе сода: кенярдемс теенза или эводемс. Атясь пеедезевсь и ляпоняста азозе:
— Тят пичедь, уноконяй, эрь ваймоть сонцень вастоц тя шить
ала. Тон пачкодят куду шинь мадомати.
Сонць эрекста стясь и вишкста тусь яннява. Шарфтсь и сельмованфса тердезе мельганза стирть.
— Атяй, — кочкамок марнек отькорьшинц пшкядсь Катя, — а
коза мои тяфта повонь?
— Да тон тонцьке, улема, ни шарьхкодить.
- Бта и шарьхкодень. Но кода верондамс? Кода тяфта лиссь?
Атясь изь отвеча, пялес ласькозь стаконь мольсь. Стирсь ласькозь ласьксь, цють кенерькшнесь мельганза... Атясь лоткась сяшкава апак учентт, Катя цють изь эрьхте теенза. Атясь шарфнезе сей-тов прянц, бта вармать никссезе, а тоса ни тага тусь инголи. Да нинге сядонга эрязста. Тяни ни корхтамбачк:
- Пингонь котфсь, стирькай, кодаф хуш и нардьста... — атясь
тага лоткась, комась аф кунара пилаф мокорть ваксе. — Няйсак,
эрь пингсь моли и кярьксави сурксонь сурке. Мярьгонь, пингонь
котфсь нарде. Аньцек шурода-весть шовсеви тя котфське и ся калатф
вастонять, варянять эзга ётават лия пингс.
Катя токазень сурбеса кизонь суркскятнень и мезе-бди ёрась кизефтемс, аньцек вирятясь тага ни эрязста кати-ков тусь. Стирсь — мельганза.
— Лисенди, мои токадень тяфтама калатф вастоняс и тяни
вирьгучкаса корхнихть...
...Стане, стане. Корхнихть фкя-фкянь мархта ёт-ёткигонь кулофсь и нинге апак шачфсь.
— Азондомс киндивок — афи верондай...
Мзярс Катя шарфнезень тяфта прясонза сембе ня мяльхнень, синь лиссть вирьста ся вастти, коса Кедяр аралазе сонь. Теенза-арам, ульсь тя аф тячи шобдава, а колмошка сяда кизода тяда инголе. Лятфнематне тага сргозьфтезь цёрать колга таколдоманц.
— Атяй, а Кедяр... пчкяй?
- Пчкяй. Сон вдь од и таза. Ну вов, пцтай и пачкодеме...
Тяса вирятясь тага лоткась, шарфтозе прянц ши валгома шири. Варжакстсь ся пяли Катявок:
— Тага ластят?!. Да кодама-бди лият ни. Афоли рузонь дружинникт?
— Синь, стирькай, синь. Тейть ворьгодема куроконе. Кда поват
кядезост, аф аньцек шинь мадомати, а мзярдовок аф поват куду.
Ласьк видеста ся лоткти, конац паргана келуть ваксса и комотть
эзонза. Да ватт, аф валгозь валк, а комотть! Кодама крхкаста тяль
няев — комотть.
- Шарьхкодень. Аньцек комотемс! А кода тон?
- Архт, архт ни. Монь инксон тят пичеде, аф юман.
Катя комафтозе прянц, а мзярда кеподезе, варжакстсь видеста вирятять седьмос:
-Атяй, аст эздон пара валня Кедяронди...
Стирсь шарфтсь и вармакс тусь лоткть шири. Сон марязе фталдонза алашань дуборфть. Кулезе, кода вяшкондсть ластятне, но мес-бди надиясь — аф сатови киндинге. Нльне пингти... Ёфси пиленц ваксса пркстадсь алаша. Эздонза яфодсь ливозь шине. ...Катянь инголе тихтедсь келу, вакссонза потмаксфтома лотка.
Катя сяшкава вишкста ласьксь — ашезь лоткав трвазонза, комотсь...