IFUSCO XXIV

Азкс
Марина Аникина

Вара бабань ширем кудняц ащесь велеть эзда цютькя ширеса. Эрясь бабанясь кунара ни ськамонза. Велеряйхне ашезь кельге сонь. Шуроста кие ётамбачк шумбракснесь мархтонза. Шумбракстыхне пцтай сембе алятольхть да атятольхть, конат ётнесть ваксканза велеть фталу срубонь шапома.
Оттневок таярдозь ётнесть ваксканза, аньцек ба аф кяжияфтомс. Сиретне, кда няйсазь Вара бабань церькуста, сельмонь кичкоргофтозь тошксесть: «Вай, колдунонь ваймось, Шкаень кудтонга лоткась пелемда!» Аньцек попсь васьфнезе сонь, кода и сембонь. Вара баба тонадсь ни кяжи ванфненди, сяс ялгат кунара изь вешенде.
Колдунбабанди сон, и виде, аф ламода шарсь: шамакедец шобда, шаржу шяяренза лову тарадкс тарксефт руцянц алда. Якай саворня-саворня. Тии колма аськолкст и тага горбаськодозь лаподи моргу байдеконц лангс. Мзяра кизодонза, кивок ашезе сода, но лангс ванозь, сядода вельф ни. Ванфоц оржа-оржа. Равжа сельмонза бта цятконят крфайхть.
Козяшиц бабать аф оцю: эсь кодямонза сиребакарь пинец, конань кунара ни кати-кие ёрдазе, а бабась прькстафтозе.
Шинь сюролдатне эжнесть модать эса. Ушеса бта и лямболь, но пингонь-пингонь уфсесь августонь кельмаза варманя. Кода и ладяфоль, иляденди цёрокшне срхкасть ульцяв, кяшендикс налхксема. Петя марязень ялганзон вяшкондемаснон, кадозе куцювонц и комотсь шра ваксста. Бабац мярназевсь:
– Тага ворьгодят. Хуш лямцень аделак! Тяфта афи касат мзярдовок.
Но Петя ни фатязень ботинканзон и врхтадсь бабанц вакска кенкшть шири. Бабац кенерсь ювадемс:
– Ванода, колдунбабать кудонц ваксса пильгокинтевок тяст уле. Ату тядяце сай, кедцень каяфтсы. Эка, вдь ёфси кулхцондомда лоткась!
– Петянь пилензовок ни исть куле.
Лямбе шиняда ёфси аф ламня лядонды. Кодама шаба тяни кудста муят? Курок школаське сай. Эста ни мзярс урокт тиендят, ушесь шоподемс кенери.
Цёранятне фкя-фкянь ётазь ласьксть веле пети. Тоса синь фалу налхксекшнесть. Эрь шиня, мянь шоподемс ашесть повонда куду. Аф ичкозе эрясь Вара бабавок. Кудонц малас кивок ашезь нажятькшне. Телевизоронь колдунда синь ашесть пеле. А месть пелендемс? Колдутт улендихть аньцек ёфксса. А тяса кати-мес пелькс. А вдруг аф аньцек ёфксонь колдутт улендихть? Да тядясновок тянкса пилеснон нефтсазь.
Туста шяярь, кудря пря Коля кяшезень сельмонзон кядьлапшса, лувсь, лувсь, аделазе лувоманц, аердсь эчке шуфтть эзда и ювадсь:
– Мон мутядязь тифтенянь,
Вов ни вешемонт срхкань!
Коля панжезень сельмонзон, шовазень клоксонза, види кядьлапшенц козырёконякс ладязе конянцты и аф эряскодозь, азоркс кармась ванондома перьфпяльге. Кода ашезь ванонда, а ялганзон цильфсновок ашель маласа. Коля стакаста таргазе ваймонц и аф мяль вельде срхкась вешемост. «
– Вов и сотцить тяни, куваня срафнезь. Мон дяряй сыщикан! – обжаф вайгяльса пшкядсь цёрокшсь. А кинди пшкядсь, афи содасы.
Мзярда Коля лувондсь, ялганза кяшендсть кусторкснень потмова и жулек келазькс ванондсть потмостост. Стама сетьмоста ащесть – ваймоснонга ашезь тарксе.
Петя сонцьке ашезе шарьхкоде, кода аердсь ялганзон эзда и ласьксь мянь Вара бабань перяфксонц ваксс. Кокшкодсь, варжакстсь перьфпяльге и таяскодсь.
– Вай, коза повонь! Тя вдь ведунбацять кудоц. Тяни месендян? А кда кундасамань?
Но меки мрдамска ашель кода, сонць вдь моли Колянь кядьс, да нинге ялгань келеса рахсесазь, мес тяшкава пели. «Мон, чяй, алян!» – Петясь нажядсь перяфксть ваксс, саворня комась. Пелемацка ков-бди юмась. «Вай, да тяса вандыска аф мусамазь. Кадок вешендихть келесост», – арьсесь сон.
Пингсь мольсь. Ялганза стаки ашельхть. Петя элякоткшнезь ванондсь. Сяда ламос кирдемшкац ашель. Срхкась ни прянь няфтема. Тя ёткть перяфксть фталда марявсь кашторф. Цёрокшсь пильгосур лангса нажядсь маланяв, конезе фкя сельмонц и педезь педсь седяфнень ёткста лазфкяти. Перяфкссь ташттонга таштоль, сяс тяфтама лазфкянь мумась ёфси аф стакаль…
…Вара баба каязе лядыкс лямть сире пиненцты, штазе соду цюгуннянц и лиссь марлювонзон ванома. Шариксь никсазе лямонц и ноласта тусь азоронц мельге. Бабась чёшазь аськолясь кажелды лопатнень ланга, лоткась «баяраванзон» ваксс и пичедезь варжакстсь вяри.
– Вов и сёксеське учевсь. Тага щамонтень кайсесть, модать ацасть тюжя ацамса. Тяда пеле, тялонясь теенть сяда мазы орнят кази, штада аф каттядязь, – корхнесь мархтост сиренясь. – Вай, идняне, баяраваняне, танцти маренте тага наксадыхть, – ризназевсь.
Тя ёткть эхянь инголенза бунтядсь марь. Шариксь бавкстадсь, яфодезе пулонц. Вара баба стакаста комась, сявозе кядезонза марьть, вадерязе-тиезе, никсазе и… арьсематне и лятфнематне кяшезь ингольденза и перяфкскять, и марлювонзон…
Тячи Вараня шинь стямать мархта пильге лангсоль ни. Пцтай веньберьф изь уда. Эряскофнезе шобдавать саманц. Исякомба атяц пилезонза тошказе: «Вараня, ванды тядяце и аляце туйхть базару, а минь самозост озафттама марлюфт. Сайхть – а минь ни минцень садоньке! Ватт, тят азонда киндивок», – атясь шукадезе суронц. Вараня аф азомшка кеняртьфоль. Сембонди няфнесь пря кяжикс, пельсь, шарьхкодьсазь арьсеманзон. А эсь потмованза моразь морась. Кода ашезь тяряфне матодовомс, сельмонзон концезень, а марлюфне сякокс стаки шарсть сельминголенза. Матодовсь аньцек шобдава шири. Онцтонзонга няезе, кода атяц стяфтозе. И кати-мес бта афи марлювонь путома, а куймоняс марень кочкама. Но кочкамс изь кенере – сргозсь…
Вараня учезе, мзярда тядяц и аляц лисихть кудста, отькорьста щазе палянц и срхкась атянц вешема. Иванатя шарондсь кудъёткса. Няезе уноконц – нльня эводсь:
–Вай, уноконяй, да тон месть тяфтама рана стять тячи?
Тонац дивандазь отвечась:
– Атяй, дяряй юкстайть, мезе тячи тихтяма?
Оцю равжа сельмонянза ванцть атянц лангс. Иван атя тись пря, бта юкстазе. Меле лаподезень бокованза кядензон и кувакаста таргазе:
–Э-э-эх! Сире кранчан! Ёфси прястон ляцсь. Пара, Вараняй, лятфтайть нинге. Месенделень тоньфтомот?
– Атяц кандозень ёмла марлюнятнень и синь кярьмодсть тевс.
Обедта меле шабась комотнесь ни путф марлюфнень вакска и кенярдезь цяпась рдазу кядензон. Марлюда котоль. Сембонь Вараня кельгозень, кода инь мала ялганзон. Иляденди састь базарста тядянц мархта аляц. Конашкава синь дивандафтозь и кеняртьфтезь од марлюнятне пересост! Базарста Варанянди усксть од паля, школав молемс сенем портфель и акша туфлят. Тядяц сюдердазень стирнять шяярензон, шназе, мес сон лездсь атянцты и венептсь курмозь конфета. Тя шись Вараняти инь мяляфтовикссь.
Марлюфнень валондозь ару ведьса и учсть, мзярда касыхть оцюста-оцюста. Вараня лац мяляфтозень атянц валонзон: «Вов шачи, уноконяй, васенце марьсь, кенери и минь киндивок аф макссаськ, тондедот башка».
Васенце марьсь Варанянди учевсь ськамонза. Кассь марьсь оцюста, якстерьгодсь, и стирнясь кандозе сонь атянц калмонц лангс. «На, атяй, – трнаты вайгяльса пшкядсь сон, – тейть кандыне. Ужяль, шиса ашат, ва мархтот марьда ярхцалеме! Марлюньке оцюфт ни, сялдазцевок сизи прязост ваномста», – сонць аварьгодсь…
Ортатнень фтала цяторфсь колазень Вара бабань арьсеманзон.
Коське тарадсь, конань лангс шятяфоль Петя, стакаста коцоргодсь и синдевсь пачк. Шарикть кашкомф вайгяленц кулемста Петя эряскодсь ворьгодемс. Ласькомста пильгоц кати-коза тапарясь. Цёранясь маряйста шлёпадсь пеконц лангс. Да нинге плманжанцка токазе. Сон фатязе пильгонц кафта кядьса, кирендсь и шуваня вайгяльнят аварьгодсь.
Вара баба марязе шабань летнямать, кулхцондсь, нинге мзярс бта афи верондась, а меле стряндась и кода маштсь, эряскодсь лездомс апак учсек инжити, сонцьке аф содасы кинди. А кодак Петя няезе каршезонза сай горбаськотф бабать, сярятьфоц ёфси ётась. Цёранять мялецоль ворьгодемс, ювадемс ялганзонды, но кати-мезень вий карнезе и тошкась: «Тят пеле! Тят пеле!» Петя венептезень кядензон инголи, бта ёрась кяшемс бабать эзда, аф нолдамс малазонза и эняльгодсь:
– Вай, колдун бабаняй, тямак поре! М-м-мон аф танцтиян! Мон аф саян оду вестеньге кудцень ваксс, клянусь!
Вара бабань седиец лакай ведьса валовсь. Цёранясь афкукс эвотьфоль, бта афи ломанель инголенза.
– Вай, иднязе, да кие тейть мярьгсь, бта мон ломаньда ярхцсян? Кодама шава пря тяфта тонафтонзе? – мярьгсь сон.
Петя стакаста таргазе ваймонц и трнаты вайгяльса азозе:
– Бабазе, тядязе… Марнек велеське тяфта корхни.
– Вай, дураконятне! Эвфнихть шабатнень эса мезьса-повсь. Кржа нинге, марнек эряфозень сивозь. Иля тевсновок аш. Тон, идняй, тяйть веронда, тяйть! Мон аф ведунан, ломаттьке аф сивондян.
– Аха! Васькафнят! А мес мле тяфтама аф мазыят да горбонат, – сяда сетьмозь кизефтезе цёранясь.
Аф весяла пеедема токазе бабать срмаф шаманц. Теенза-арам, тёжятть и тёжятть кизот сон ашезе марьсе прянц тяфтама тёждяста.
– Да кизодон ни содалить мзяра! – станяк пеедезь азозе сон.
– Мзяра?
– Лама, цёраняй, лама! Тнярс велесонк нинге кивок ашезь эря!
Петя ёнюста срмазе конянц, меле саворня вяшксь. Но корхтамс ни мезьге ашезь корхта. Улема, цютькя пельсь кулемс мзярос эрясь тя бабась. Теенза-арам, Вара баба эрясь афи фкя эряф, а колмошка.
–Вай, тнярс, ни мярьган, афи эряйхть!
Вара баба тага штафтозе пейфтома кургонц, пеедезевсь.
Мзярошкас синь ванцть фкя-фкянь лангс апак корхтак. Петя арьсесь, што колдунбабать эзда ёфси аш месть пелендемс, и шамаска бабанясь бта сяда одкстомсь и мазомсь. Вара бабань седиге срадсь лама кизоста юкстаф лямбонясь и эряфти кенярдемась. Сон марясь кодама-бди афкуксонь кельгома тя нолгу цёрокшти.
– Тон вдь Аннань цёрацат? А кода лемце?
– Лемозе Пётр, – смелста отвечась Петя. И прибавазе, – Пётр Владимирович!
– Мезе ина, Пётр Владимирович, кда угадять, сувак пялон, пара инжикс улят. Аде-ка, аде-ка! Марьда каваняте. Танцтихть, кургозт солайхть!
Петя тага эводсь. Ронгованза ётась кельмоня, шуваня салмокскя пялезе шабать седиенц. Прясонза тага эвондась мяль: «Анттанза колдубаф марьда и кулат. Тяста эряви пильгонь-прянь синдезь ворьгодемс». Но кати-кие тага тошказевсь: «Тят пеле! Тят пеле!».
Вара баба венептезе пакарю кяденц, Петя аф смелста кундазе сонь и синь саворня срхкасть марлюфнень ваксс. Молемста Петя азозе, кода кяшсь ялганзон эзда и конашкава васенда эводсь.
Петя и Вара баба сувасть пери. Лопань и марень шиненя яфодсь перьфпяльге. Перяфксть омбокса сон мес-бди аф тяшкава марявсь. Тяса сембось кеняртькшнесь Петянь саманцты. И тёждя варманясь, и марлюфнень марю и стака тарадсна, конат кода од азорснонды, сюконякшнесть цёрокшти. А лопатне кажелдсть пильгалонза и морсезь салаваня эсь мороснон. Нльне Шарикське сяда эреклась, бта одкстомсь. Сон кенярдезь яфчазе пулонц и колендемга усксезе ялганц штана педа.
Мзярошка пингта меле Петя азоркс якась марлюфнень ёткова и варчсесь марьхнень таньфснон.
Вара баба ванць, конашкава танцтиста цёрокшсь сускондсь марьхнень эса, бта пельсь, кивок сявсыне кядьстонза, и сонцьке ашезе маря, кода начксть сельмонза. Мяште потмованза ётась лямбе варманя. Бабась кеподсь лопатнень лангста якстерь марь кельксезня сюдерясь эсонза. Эряфонь сталмотневок ся пингть юкставсть.
– А мес тонць, бабай, аф ярхцат марьда? – тяни ни эсь ломанькс толкавась Петя.
– Монь, уноконяй, пейне аш. Аф поревихть. А тон ярхцак. Марьхне тейть ёнь и вий максыхть.
Петя юкстазень ялганзонга. Сон повсь лия эряфс, коза кивок нинге ашезь повонда.
Ялганза ламос вешендсть эсонза. Шарозь сембе содаф и аф пяк содаф васттнень. Но костовок ашезь му. Арьсесть: Петя салава ворьгодсь куду, кяшсь и тяни тоса рахси лангсост. Нльне кяжиясть лангозонза. Аф лама пингта меле синьге тушендсть кудгаст.
Петя лятфтазе кудонц, тядянц, ялганзон и семботь колга, мзярда ушеса шопотькшнесь ни. «Ва тядязень эзда пови!» – арьсесь эсь пачканза. Но бабаняти мезьге изь корхта. Сембода пельсь, каба тядяц афоль сода тяза сашендоманц колга. Ва ни сейхтьсы алгань пулонц!
Вара баба варжакстсь сельмозонза и семботь шарьхкодезе. Ашель мялец нолямс ваксстонза од касыкскять, шинь сюролданять, бта пельсь лядомс ськамонза сяка шобда эряфонц потмос. Но мезьге аф тият. Ильхтезе цёранять орталангс, крёстондазе и … Петя няезе, кода шама срмафксонзон эзга тусть сельмоведень шудерькскат. Сон кундазе бабанять кядьта и эняльгодсь: «Вара бабай, тят аварде, мон нинге саян. Тон аф колдунат, тон цебярят-цебярят! Мон содаса!»
– Сашентт, идняй, сашентт! Шкайсь най улеза вакссот! Тямак юксне, коль сашентт! – стаконь тошксесь сиренясь орталангса.
Петя содазе – кудса сюцесазь, сяс аськолясь аф смелста и аф эряскодозь. Сон пцтай пачкодсь ни. Шобдать потмова молемста тага кати-мес пелезевсь: «А кда лиси инголен? Али сатсамань?» Теенза-арам, кати-кие моли мельганза, ваны лангозонза и вов-вов цопади копорезонза. Кармась аськоляма сяда вишкста. Вармаське сяда кяжиста эцекшнесь жемпоронц алу. Ёрась ни тумс ласькозь. Но лятфтазе, кода Вара баба андозе марьда и аварьгодсь тумстонза. Сире Шарикське вона кода кенярдезь шарондсь перьфканза.
Тяни Петя содасы: Вара баба аф колдун. И азсы тянь тядянцты и бабанцты. Синь шарьхкодьсазь.
Куцема песа учсесь эсонза тядяц.
– Тон косолеть тнярс? Вармась пачкат ётай, а тон шуваня щамнясат. Куроконе куду сувак.
Молембачк тядяц мярнась кати-мезе, но Петя ни мезьге ашезь куле. Сон эряскодсь кудботмонь лямбе нарфкяти. Сувасть куду. Бабац кати-мезе стряпась плитать ваксса и салаваня азозе: «Мусак тяни вастцень!»
– Тон, цёрай, никак ёфси кедьста лисендят. Бралгондоть шиньберьф кати-куване. Вачеткя, штаткя… Косолеть тнярс?
Петя нолдазе прянц, сетьмоста-сетьмоста азозе:
– Тядяй, мон Варабабань пяли якань.
– Кинь? Ки-и-инь? – эводсь тядяц. – Колдунть пяли?
Бабац лоткафтозе газть, ёразе урядамс пачкалгть, но ашезь кенере и тонац кайгиста цятадсь мастору.
– Да тон дураськодоть, што ли, афпармор шаба? Месендеть тоса? Кодама стама тев мельге тов якать? Кие воденданзе?
– Тядяй, кивок ашемань воденда. Минь тоса кяшендикс налхксеме. Мон и кяшень тоза.
– Кяшендикс сон налхкондсь! Тейть мзярксть мярьгондсть? Духцевок афоль уле кудонц ваксса! Ва киськцень каяфтса, оду сяда ёният.
А бабац шкай уженять инголе кайсесь крёст, да кати-мезе бтнась.
Петя комафтозе прянц тюри буканякс:
– Кодамовок сон аф колдун, сон цебярь, сон марьда каванямань.
– Ваностяка, сон марьдонзонга кенерсь ярхцамс! – тядяц маряйста фатязе Петянь пиледа и ряфцодезе ваксстонза. –Ворьть ингольден!
Петя аварьгодсь. Авардембачк валхнень азонкшнезень стакаста:
– Тядяй, верондамак! Вара баба цебярь. Теенза стака ськамонза. Аде пялонза, и тонцьке няйсак.
– Ворьть, мярьгонь. Оду ульцявга аф молят, кудса кармат нюрьксема, кда ломанькс аф шарьхкодят. Шаракофтозе шабать прянц ломань ваймонь сивись.
Петя каязень щамонзон, лаподезень табуретка лангс, эцесь вастонц потмос, комачась пря одеяласа и кулхцондсь, кода тядянц мархта бабац кати-месть тошксесть вельхкссонза, улема, морафтсть молитват.
Петя коданга ашезе шарьхкоде, мес тядяц тяшкава кяжиель? Мес ашезь веронда теенза? Мезенкса Вара бабань лемдезе колдунбабакс? Кизефтемаль сонць Вара баба. Но кода кизефтьсак? А кда кяжияй?
Велесь ваясь шобдати. Ульцяса кивок аш. Сифтемнянь пачка сетькяй кельме пизем. Вармась шаронды куттнень ёткова, чакси вальмятненди и эвфнесыне ломаттнень ризфу моросонза, бта афи морай, а саворне явси.
Вара баба пульцком арась шкайнятнень инголи и ламос озондсь. Меле стакаста стясь, тупор-тапор маладсь вастонцты, каязень калошанзон, лаподсь. И тага лядьсь мялезонза акша пря цёрокшсь. Тя ёткть пинец, кона матфоль кенкш лангс, ёрась ни бавкстадемс, но ашезь увазев, пичедезь куфцезевсь. «Мезе тяни куфцекшнят, а? Сиредеме, няк, сиредеме. Тят пичеде, сай ялганяце, сай!» – пшкядсь пиненцты. Ся бта шарьхкодезень валонзон, стяфтозень пилензон, варжакстсь сей-тов коса ина ся ялганясь? Бабась нузямсь. Конезень сельмонзон и кати матодовсь и онц шоворсь, кати ваясь лятфнеманзон потмос.
…Перьфпяльге пижелдыхть исатне, мазопнесазь ляй берякнень. Тарадсна стакаста сюконякшнихть пцтай ведти. Вара Коля мархта озафт исать алу. Коля ашкордазе, люпштазе кели мяштенцты, а Вараня визди, визди… Коля ёразе паламс и сонга аноколь марямс Колянь пси трванзон. Тя пингть шуфттнень фталда марявсь стирень рахама.
… Вара баба панжезень сельмонзон, удомац явась. Кунардонь фкя-сяка кизефкссь муцсесь эсонза. Мес тяфта шарсь эряфоц? Мес ломаттне ашезь вешенде видеть? Мезень кальдяв сон тись теест? Но отвечай ашель. И стака арьсеманза тага вайсесть шобдать потмос. Учсесь паваз, надиясь мумс кельгоманц, кода надияй и эрь ломанць. Тяфта и ульсь васенда, мзярда сон нинге ёфси одоль. Эста вероц комболдсь Колянь ванфонц эзда. Павазсна нармонь лаца лиендсь менельге. Коля срхкась кучемс Варань пяли кудат, но урмась прафтозе пильге лангста. Аф враченди, аф воражиянди ашезь пчкафтов. Колянь куломанц мархта бта кулось стирть седиец. А тяса нинге стирь ялгац срафтсь колганза куля, бта Вара якась колдун бабанди, уфафтсь шятема ведня и симдезе Колянь. Сяконь сюнода, няк, Коля и кулось. Кати верондасть ломатть, кати аш, а ваксканза ётнесть валнянь апак аст. Ато и ёфси кадондозь киснонга. Кинь мезец юмай, кие сярятьксты, кулы – туфталсь фкя: Вара тиезе. А тоса ёфси ни лемонцка ашезь азонкшне – «колдунбацясь; ведунбацясь». Мзярс шисотольхть тядянза-алянза, сяда тёждяль. Но сась пингсна – сиредсть и кулость. И сон лядсь эхянь ськамонза.
Эряфсь содай шудеманц. Ялганза кунара ни ашет шиса. Велети сашендыхть од ломатть, саворне тонаткшнихть велеряйхнень басняснонды, ёфксснонды. И теестка Вара баба арси сире, сире ведунбацякс.
Петя сргозсь поздна ни, обедшкада. Но стямс ашель виец. Ронгоц сярядсь, кельме салмокскат пялендезь. Сельмонза эслек кончсевсть, бта недяляшка ашезь утце. Лятфтазе исяконь илядть. Цёранясь коданга ашезе шарьхкотькшне: афкукс тя ульсь али онцтонза. Кенкш лангса ащесь тядяц. Ванфоц бта кяжи и тяка пингть пичефксу. Петя шарьхкодсь: «Аф онцтоноль сембось, шистон!»
– На, симк куроконя. Пряце сяряди? – тядяц венептсь кружкаса мезень-бди тише ведня.
Петя симозе, пувордазе кургонц.
– Сипть, сипть, сяда пчкат! Оду содасак, кода ведунть пяли якамс.
– Сивозе шабать сире ведунбацясь! – марявсь тонакудста бабанц вайгялец.
Тядяц тусь работама, бабац шарондсь кудъёткса. Петя марязе прянц кальдявста: ронгоц то валондовсь кельме ливозьса, калкфтсь эчке вельхксть ала; то пошанфнезе псись, и ваймоцка стакаста тарксевсь, мярьгат, кожфсь ашезь сатне. Сон симозе сяпи тише ведть, конань кадозе бабац и тага прась онц. Сргозсь илять. Панжезень сельмонзон, вакссонза озафоль тядяц. Табуреткать лангса путфтольхть колма марьхть и курмозьшка конфета. Петянди арась бта сяда тёждя. Пряц аф сяшкава сярядсь, кельме салмокскятне лоткасть ронгонц пялендемда.
– Пряцень кода марясак? – ляпоняста кизефтезе тядяц.
– Лац, тядяй.
– Эрь, эрь, ярхцак идняй. Ва бабацень мархта жувататнень андсаськ, пачат пидян.
Тядяц каязень цебярь щамонзон, щась-карясь кудъётконнет и лиссь ушу. Минуташкада меле – чёш-чёш! – тусь бабацка. Тумстонза кардазе уноконц: «Ватт, тят лисенде ушу!»
Петя лядсь ськамонза. Седисонза катонь киськоряматне тага вихонзасть. Ёрась арьсемс мезень-мезень весяла тевонь колга, но кодамовок весяла тев ашезь лятфтав. Лятфтавсь кати-мес Вара баба. Теенза-арам, бабась пяк учсь эсонза. Нльне сельмоведенза тусть. Вармань сувомась и пиземонь покорфсь пачфтсь куля Вара бабань тердеманц колга. Петя аноколь ласькомс ташта, ширемф куднять малас.
Цёрокшсь стясь вастонц лангста, пелезня маладсь кенкшть ваксс. Щазе эчке куртканц, путсь вазь, таргазень резиновай кямонзон и лиссь ушу.
Кардста марявсь ведаркань калдордома. Пиземсь този сетьмось, но вармац ашезь лотксе. Петя шарфтсь кудть шири, пелезевсь, аноколь сувамс меки куду. Но марязе тядянц вайгяленц – учемс аш пинге! Теенза стакаль тиемс васенце аськолксть. Но сон шятясь! Салаваня шятнезь валгсь крыленцянь куцеманява и тусь. Седиец таколдсь. Цёранясь пельсь – аф саты смелшиц, мрдай. Сяс и тусь ласькозь. Сон ласьксь стакаста, мярьгат, тюрсь каршезонза уфай вармать мархта.
Варабабань вальмя сельмонза авардсть; пизем путерьксне шудесть сельмоведь путерьксокс. Кудняцка тячи эхянь уроскяль, конац киндивок аф эряви. Петя тостядезе кенкшть. Кенкшец панжадоль. Кудонголе шобдаль. Сон кядьёжеса вешезе кенкш кундамать, саворня сувась. Шариксь афи увазевсь. Содазе! Яфчазевсь пулонц мархта, ласьксь ваксозонза и шуваняста сувозевсь. Петя шарьхкодезе: эсонза учсесть. Комась и ашкордазе Шарикть, сюдердазень пиле ваксонзон, нажядсь Вара бабань вастонц ваксс.
Вара баба ваймонц тарксезе стакаста, сельмонза пялес коньфтольхть.
– Петя, цёраняй, сать? А мон учсян, учсян эсот.
Петя няезе шаманц – эводсь.
– Вара бабай, сярядят?
– Аф, аф, идняй, тят эводе, – сон кундазе цёранять кядьта, озафтозе эсь ваксозонза. – Ваймонь сявись, идняй, вакссон якай.
Петя трнатозевсь, сельмонза покарьгодсть, мярьгат, сонга марязе, кода кудса якай ваймонь сявись.
– Тят пеле, идняй! Тят пеле! – люпштазе кяденц Вара баба, – сембосяка мзярда-аф мзярда кулома. Да сон вдь аф Тонь, а Монь инксон сась.
Петя аварьгодсь:
– Вара бабай, мон кулома аф катте!
– Да сон афи кизефтьсамазь. Сай и сявсамань. Эрь, и пинге ни, саты. Стадонга Шкайсь ламос якафтомань тя шиса, пинге ни тонашив тумс.
– Вара бабай, мон курок саян. Аньцек тядязень инкса ласькан. Сон лезды тейть. Сон сай. Аньцек ватт, тят кула самозонк, – Петя комотсь вастстонза и ёрась ни тумс ласькозь.
– Ожу, ожу, идняй, тят эряскода. Кулхцондомак, меле туят, – коль сяда стакаста и стакаста азонкшнезень валонзон бабась. – Марлюнятнень… Тяйть кадонда… Ванондыть… Тяйть макссе… Тарадснон синнемс. Шариктьке… тяк юксне… Сон вдь эхянь… Ськамонза ляды. Моньге коста-коста лятфнемак. Сандярят – кенярдян… Архт тяни, идняй. Улеза Шкайнясь вакссот.
Кувакаста таргазе ваймонц и сетьмось.
– Вара бабай, тят кула! Тядязе лезды тейть!
Вара бабань аш кашт молиец.
Петя эводсь. Рангозевсь. Лиссь кудста и тусь ласькозь тядянц инкса.
Ушеса сюнераль. Вармась сядонга вихонзась, стаконь почердсь пиземнясь. Но Петя мезьге изь маря. Сон ласьксь и ласьксь.
Вара баба конезень сельмонзон. Трванзон токазе тёждя мзолфкя. Эздонза няевсь кенярдема, кельгома… Мярьгат, сондедонза павазу ломаньге ашель.
Вармась стаки мольфтезе ризфу моронц. А пади, афи морась, а явсесь?
Мархтонза явсезевсь Шарикське…